Röðull frá Kálfholti og Ísleifur Jónasson eru enn efstir í B-flokki gæðinga eftir milliriðla sem riðnir voru í morgun, með einkunnina 8,68. Fast á hæla þeim koma Eldjárn frá Tjaldhólum með 8,66 og Akkur frá Brautarholti með sömu einkunn.

Seiður frá Flugumýri er enn hæst dæmdur 4 vetra stóðhesta eftir yfirlitssýningarnar í dag. Kiljan frá Steinnesi er annar hæstur og Kappi frá Kommu hlaut þriðja hæsta dóminn í yfirlitinu, hækkaði sig talsvert frá kynbótasýningunni á miðvikudag.

Röðun þriggja hæst dæmdu 5 vetra stóðhestanna breyttist ekki í yfirlitssýningunni sem fram fór í dag. Ómur frá Kvistum stendur enn efstur með 8,61 í aðaleinkunn, þá sömu og fyrir yfirlit.

Einungis litlar breytingar urðu á dómum eftir yfirlitssýningar 6 vetra stóðhesta síðdegis. Glotti frá Sveinatungu er eftir sem áður hæst dæmdur.

Orrasonurinn og hæfileikahesturinn Gaumur frá Auðsholtshjáleigu er efst dæmdur 7 vetra stóðhesta og breyttist sú staða ekki eftir yfirlitssýningu. Aðaleinkunn Gaums hækkaði á Landsmótinu úr 8,54, sem hann hlaut á Héraðssýningú á Sörlastöðum í vor í 8,69.

Sigurður Óli Kristinsson á Blökk frá Kílhrauni sigraði í 150 metra skeiði. Sigurbjörn Bárðar á Neista frá Miðey varð annar og Teitur Árnason á Veigari frá Varmalæk þriðji.

Skeiðkempan Sigurbjörn Bárðarson sigraði 250m skeiðið sem fór fram undir kvöld. Mikill fjöldi fólks fylgdist með í brekkunni, en nú snemma á föstudagskvöldi er áætlað að um 8 þúsund manns séu komnir á mótssvæðið.

Áhorfendur á Landsmóti völdu Blesaastaði 1 besta ræktunarbúið í sms símakosningu sem fram fór á föstudagskvöldið að loknum sýningum ræktunarbúa.

Borði frá Fellskoti sigraði B-úrslitin í B-flokki í morgun. Þeir félagar Borði og knapi hans, Sigursteinn Sumarliðason, hafa því áunnið sér rétt til að keppa í A-úrslitunum sem fara fram á morgun.

Hanna Rún Ingibergsdóttir vann sannfærandi sigur í B-úrslitum í flokki unglinga. Hún fer því í A-úrslitin sem fara fram á morgun sunnudag.