Fréttir: Nóvember 1999

Valdimar Bergstað og Leiknir frá Vakurstöðum eru efstir eftir forkeppni í flokki ungmenna í dag. Þrjátíu efstu hestar komast í milliriðil sem fram fer á miðvikudag. Þriðji aukastafur réð úrslitum um hverjir kæmust í milliriðil.

Hart var barist í forkeppni í unglingaflokki og hafnaði Sara Sigurbjörnsdóttir í efsta sæti á Hálfmána frá Skrúð, með 8,54 í heildareinkunn. 30 knapar og gæðingar þeirra komast áfram í milliriðil í unglingaflokki.

Vegna fréttar um verð á skeifum hér á www.lhhestar.is vilja forsvarsmenn hestavöruverslunarinnar TopReiter taka fram að þar eru allar skeifur á jafnaðarverði, hvort sem þær eru 6, 8, eða 10 mm. Í fréttinni var aðeins stuðst við verð á 8 mm skeifum. Skaflar í TopReiter kosta 70 krónur en ekki 95 krónur eins og samkvæmt fyrstu upplýsingum.

Elding frá Haukholtum stendur efst í flokki 6 vetra hryssna, alhliða geng undan Hrynjanda frá Hrepphólum. Fjóla frá Kirkjubæ fékk geysiháar hæfileikaeinkunnir, en hún er klárhryssa með 9,5 bæði fyrir tölt og brokk.

Fjöldi sterkra hesta mætir til keppni í B-flokki gæðinga, en forkeppnin fer fram í dag. Athygli vekur að Leiknir frá Vakurstöðum hefur verið dreginn úr keppni. Valdimar Bergstað, knapi hans, ávann sér réttinn til að keppa bæði í B-flokki og ungmennaflokki fyrir Fák og hefur hann ákveðið að einbeita sér að ungmennaflokknum eingöngu með Leikni.

Margar góðar sýningar mátti sjá í forkeppni í barnaflokki á Gaddstaðaflötum í morgun. Birna Ósk Ólafsdóttir á Smyrli frá Stokkhólma var fremst meðal jafningja og stendur efst eftir keppnina í morgun með einkunina 8,58. Niðurstöður eru komnar eftir forkeppni í barnaflokki.

Kynbótasýningar í flokki 5 vetra hryssna hófust í gærkvöldi, en þeim lauk í dag. Alls voru 44 hryssur sýndar og var Píla frá Syðra-Garðshorni efst eftir daginn. Yfirlitssýningar í þessum flokki fara fram á fimmtudaginn.

Mjög spennandi og hörð keppni fór fram í forkeppni í B-flokki gæðinga við heldur erfið skilyrði. Bálhvasst var í braut, en sýningar margar hverjar mjög góðar þrátt fyrir það.Svo fór að gæðingurinn Röðull frá Kálfholti var efstur með einkunnina 8,79.

Rásröð liggur fyrir í B-flokki gæðinga, sem fara fram á föstudagsmorgun.