Fréttir: Apríl 2010

Hér má nálgast uppfærðar FIPO reglur fyrir íþróttakeppni á ensku. 1.apríl ár hvert eru FIPO reglurnar uppfærðar og gefnar út á heimasíðu FEIF, www.feif.org.

Á stjórnarfundi Meistaradeildar VÍS í dag var tekin sú ákvörðun að fresta Lokamóti Meistaradeildar VÍS. Stefnt er á að halda mótið eftir fjórar vikur og gæti þá mótið orðið á öðrum vikudegi en fimmtudegi.

Óhætt er að segja að Stórsýningin Fákar og fjör hafi staðið undir væntingum. Þrátt fyrir afföll vegna hósta og eldgoss var þetta hin besta skemmtun. Við Léttismenn þurfum ekki að kvíða framtíðinni þar sem Léttiskrakkarnir undir stjórn Linu Eriksson sýndu mjög skemmtilega sýningu og voru vel ríðandi. Bæði atriði Léttiskrakkanna tókst vel. Skemmtilegt var að sjá Ólaf Svansson og hans fjölskyldu sem og Baldvin Ara og Ágústu dóttur hans.  Kátir voru þeir nú Léttis-karlar í skrautreið sinni og lukkaðist hún vel og er gaman að sjá hve mörg „heima“ atriði voru í sýningunni.

Opna íþróttamóti Mána og TM hefur verið frestað vegna kvefpestar sem gengur nú yfir hrossin á Mánagrund og víðar. Mótinu er frestað um óákveðin tíma. Er þetta gert samkvæmt ráðleggingu frá dýralækni.

Páll Bragi Hólmarsson, hrossaræktandi og tamningamaður í Austurkoti, hefur verið ráðinn liðstjóri íslenska landsliðsins í hestaíþróttum fyrir Norðurlandamót. Norðurlandamótið verður haldið í YPÄJÄ í FINNLANDI dagana 4.-8.ágúst 2010. Nánari upplýsingar um mótið er að finna á heimasíðunni www.nc2010.fi  

„Við stefnum í heildina með 15 til 20 hross í úrtöku fyrir Landsmót. Þetta eru allt verulega frambærileg hross, en það skýrist með vorinu hversu mörg eru tilbúin í keppni eða sýningar,“ segir Hinrik Bragason, hrossaræktandi og hestamaður með meiru, á Árbakka í Rangárþingi ytra.

Hið sívinsæla Kvennatölt Gusts og Landsbankans fór fram í reiðhöllinni í Glaðheimum í gærkvöldi. Til leiks voru skráðar vel á annað hundrað konur í fjórum styrkleikaflokkum og var keppnin hörkuspennandi og skemmtileg.

Vegna ónógrar þátttöku fellum við niður fyrirhugaða stóðhestakynningu sem átti að vera laugardaginn 17.apríl í Top Reiter höllinni á Akureyri. Undirbúingsnefnd Fáka og fjörs.