Fréttir: Ágúst 2008

Teitur Árnason á Hraunari frá Kirkjuferjuhjáleigu var hársbreidd frá Norðurlandameistaratitli í gæðingaskeiði ungmenna á NM2008 í Seljord. Niðurhæging í fyrri spretti mistókst en seinni spretturinn var mjög góður. Hann hafnaði í öðru sæti. Það var hins vegar Svíinn Hedvig Larsson sem hreppti gullið með nokkrum yfirburðum, fékk 6,30 í einkunn. Arnar Bjarki Sigurðsson á Snar frá Kjartansstöðum varð fjórði.

Ragnheiður Hallgrímsdóttir er Norðurlandameistari í gæðingaskeiði unglinga. Hún reið hestinum Júpíter frá Ragnheiðarstöðum, sem er undan Kolskeggi frá Kjarnholtum og Venusi frá Skarði, sem Sigurður Matthíasson reið sig frægan á um árið.

Heimir Gunnarsson á Ör frá Prestsbakka er efstur í fjórgangi fullorðinna á NM2008 eftir forkeppni með 6,97 í einkunn. Hann átti hnökralitla og heilsteypta sýningu og allir dómarar nokkuð sammála í einkunnum. Næstur er Jóhann Skúlason á Kiljan frá Blesastöðum 1A með 6,90. Báðir keppa fyrir Ísland, báðir búsettir í útlöndum.