Fréttir: Ágúst 2008

Danir leggja mikið upp úr góðum félagsanda. Þeir fengu því til liðs við sig hátt metinn andlegan „peppara\" (Mental coahc), Rasmus Bagger að nafni, sem meðal annars hefur þjálfað danska íþróttamenn í andlegri hressingu fyrir Ólympíuleika.

Gabi Holgeman á Takti frå Örvik keppir í A úrslitum í fjórgangi fullorðinna á NM2008 í Seljord. Keppni í B úrslitunum var jöfn og spennandi og litlu munaði að Laura Midtgård á Herkules fra Pegasus velti Gabi úr sessi í fyrsta sætinu.

Edda Hrund Hinriksdóttir var efst inn í B úrslit í fjórgangi ungmenna og hélt því sæti í úrslitunum. Mjótt var á munum milli þriggja efstu keppendanna.

Íslenskir keppendur voru seigir í B úrslitum í morgun. Eyjólfur Þorsteinsson kláraði sig af fimmganginum með nokkrum yfirburðum. Þó voru skeiðsprettirnir ekki auðveldir fremur en í forkeppninni.

Rafrænn tímatökubúnaður á NM2008 hefur ekki virkað sem skyldi. Það er ekki nýtt á Norðurlanda- og heimsmeistaramótum. Endurteknar bilanir í búnaðinum hafa sett strik í reikninginn. Ýmist er stuðst við rafræna klukku eða uppreiknaða handklukku.

Guðmundur Einarsson á Sprota frá Sjávarborg er Norðurlandameistari í 250 m skeiði á NM2008. Sproti hljóp á 22,05 sekúndum í þriðja spretti, átti 22,15 frá því í gær.

Tina Kalmo Pedersen á Hrefnu frá Ebru er efst í fjórgangi ungmenna á NM2008 eftir forkeppni. Hún keppir fyrir Noreg. Tina var síðasti keppandi inn á völlinn. Það var þó ekki það sem réði úrslitum. Hrefna er afar góð á grunngangtegundunum og Tina er góður reiðmaður, þótt hún sé ung að árum.

Íslendingar hafa ekki roð af frændum sínum í fimmgangi á NM2008 í Seljord. Keppendur í A úrslitum eru skör hærri en kollegar þeirra á nýafstöðnu Íslandsmóti, bæði hvað varðar hestakost og reiðmennsku.

Þrír íslenskir keppendur eru í A úrslitum í fimmgangi unglinga og ungmenna á NM2008. Teitur Árnason á Hraunari frá Kirkjuferjuhjáleigu er efstur með 6,27. Teitur er einn af efnilegri ungu knöpunum.