Fréttir

Formannafundur Landssambands hestamannafélaga var haldin í dag, 28.maí, í húsakynnum ÍSÍ. Fundurinn var vel sóttur en auk formanna og fulltrúa hestamannafélaganna sátu fundinn: stjórn LH, fyrrverandi formenn LH, formaður FHB og formaður FT. Fyrir hönd Landsmóts hestamanna ehf. mættu: stjórn Landsmóts ehf., framkvæmdastjóri, mótsstjóri og hluti framkvæmdanefndar.

Yfirlitssýning kynbótahrossa  á Sörlastöðum er á morgun föstudaginn 28. maí  og hefst kl. 10:00. Byrjað verður á hryssum í flokki  7 vetra og eldri  og endað á stóðhestum 7 vetra og eldri.  Reiknað er með að hádegishlé verði tekið þegar sýningum á 5 vetra hryssum er lokið, þannig að eftir hádegi verður byrjað á 4 vetra hryssum og síðan yngstu stóðhestunum.

Nú liggur fyrir að smitandi hósti er ekki af völdum neinna af þeim alvarlegu veirusýkingum sem þekktar eru og leggjast á öndunafæri hrossa. Bakterían Streptococcus zooepidemicus hefur hins vegar ræktast úr öllum sýnum sem tekin hafa verið úr hrossum með hósta og graftarkenndan hor, en ekki úr hrossum sem eingöngu hafa verið með nefrennsli eða heilbrigð.

Félag tamningamanna lýsir yfir áhyggjum vegna þeirrar stöðu sem er upp er komin varðandi smitandi kvefpest í hrossum. Þar sem ekki hefur tekist að greina veiruna eru afleiðingar pestarinnar enn óljósar og hún virðist þrálát og erfið viðureignar.

Reiðmaðurinn, er tveggja ára nám í gegnum Endurmenntun Landbúnaðarháskóla Íslands, sem tekið verður inn í þriðja sinn í haust. Námið verður boðið fram, m.a. á Flúðum, Iðavöllum á Héraði og á höfuðborgarsvæðinu. Kennt er ca. einu sinni í mánuði frá föstudegi til sunnudags, september til apríl bæði árin. Auk þess fær fólk bóklega kennslu í gegnum fjarnám og staka fyrirlestra.

Úrtaka hjá hestamannafélaginu Létti, Akureyri, verður haldin 5. júní á Hlíðarholtsvelli í Lögmannshlíð.  Við munum halda 2 úrtökur, 5. júní og líklega 19. júní. A.T.H. að í þetta sinn verður einungis riðin forkeppni. Við munum líklega ríða úrslit í seinni úrtökunni.

Enn hefur verið ákveðið að framlengja skráningarfrest á kynbótasýninguna á Gaddstaðaflötum við Hellu. Síðasti skráningardagur verður fimmtudagurinn 27. maí.  Bændasamtök Íslands hafa gefið leyfi til að sýningin standi til 18. júní.

Eins og glöggir lesendur heimasíðu LH hafa tekið eftir þá er kominn gluggi efst til hægri á heimasíðuna, Íslandskort yfirskrifað Kortasjá – reiðleiðir, hér er viðmót kortasjárinnar mun betra en var áður á heimasíðunni. Fyrirhugað er að fljótlega bætist við reiðleiðir á suður- og vesturlandi auk reiðleiða á hálendinu og svo koll af kolli eftir því sem efni og aðstæður leyfa.

Landssamand hestamannafélaga boðar til formannafundar föstudaginn 28.maí n.k. kl 13:00 í húsakynnum ÍSÍ Laugardal. Fundarefni: Landsmót 2010 á Vindheimamelum.