Fréttir: Júní 2010

Þann 30. júní munu níu af fremstu íþróttasálfræðingum Evrópu koma til landsins og halda ráðstefnu um íþróttasálfræði og afreksíþróttir í samstarfi við ÍSÍ og Háskólann í Reykjavík. Einkunnarorð ráðstefnunnar er hagnýting. 

Alþjóðlegi Ólympíudagurinn verður haldinn hátíðlegur um allan heim þann 23. júní. Þennan dag árið 1894 var Alþjóðaólympíunefndin stofnuð.

Opið íþróttamót verður haldið í Víðidalnum helgina 2. - 4. júlí. Mótið er World Ranking mót og verður keppt í tölti, fjórgangi, fimmgangi, slaktaumatölti, gæðingaskeiði og 100m skeiði í öllum flokkum. Mótshaldarar áskilja sér þó rétt til að sameina flokka ef næg skráning fæst ekki í einhverjum greinum.

Sumarfjarnám ÍSÍ á 1. stigi þjálfaramenntunarinnar hefst mánudaginn 28. júní nk.  Hægt er að skrá þátttöku á namskeid@isi.is eða í síma 514-4000 til og með föstudagsins 25. júní nk. 

Eins og skýrt hefur komið fram í fréttatilkynningum frá Mast er ekki hægt að tengja faraldur smitandi hósta sem nú fer um hrossastofninn við neinar veirusýkingar sem þekktar eru fyrir að leggjast á öndunarfæri hrossa. Þar eru meðtaldar herpesveirurnar EHV-1, EHV-2, EHV-4 og EHV-5.

Í dag er síðasti skráningardagur á kynbótasýninguna á Gaddstaðaflötum sem hefst 28. júní. Tekið er við skráningum í síma 480-1800 en einnig er hægt að skrá hross til sýningar á heimasíðu Búnaðarsambands Suðurlands www.bssl.is.

Páll Bragi hefur valið ungmennið Teit Árnason í íslenska landsliðið í hestaíþróttum fyrir NM2010 sem haldið verður í Finnlandi 4.-8.ágúst.

Gæðingakeppni Léttis verður haldin 24.-25. júlí á Hlíðarholtsvelli, Lögmannshlíð. Nánar auglýst síðar.

Kynbótasýning verður haldin á Gaddstaðaflötum við Hellu vikuna 28. júní til 2. júlí. Eins og sjálfsagt flestir vita var sýningunni sem vera átti 31. maí til 14. júní frestað vegna hrossapestar þannig nú þegar hefur verið tekið við þó nokkrum skráningum á sýninguna.