Samfylkingin svarar spurningum LH

24. apríl 2009
Fréttir


Allir stjórnmálaflokkarnir höfðu áður fengið sendan spurningalista með sjö spurningum frá LH, sem varða hagsmuni hestamanna. Óskað var eftir svörum við öllum spurningunum. Á fundinum fór Haraldur yfir spurningalistann og svaraði fyrirspurnum frá frambjóðendum, sem sýndu málinum mikinn áhuga. Svör flokkanna verða birt hér á heimasíðu LH um leið og þau berast.

Hér með birtast svör frá Samfylkingunni:

INNGANGUR:

Spurningar til stjórnmálaflokka frá Landsambandi hestamannafélaga fyrir alþingiskosningarnar 2009.

Landssamband hestamannafélaga (LH) er þriðja stærsta sérsambandið innan ÍSÍ.  Reynslan sýnir að um þrír til fjórir aðilar fylgja hverjum þeim sem skráður er í félagi í hestamannafélag.  Félagar í LH eru nú um 12.000 sem þýðir að um 35.-40.000 manns stundi hestamennsku reglulega hérlendis.
Landsmót hestamanna er einstakur íþróttaviðburður og sá eini á Íslandi sem dregur að sér hátt í 15 þúsund gesti, þar af er um fjórðungur erlendir gestir sem sækja Ísland gagngert heim vegna viðburðarins.  Hestamennska er ein fjölskylduvænasta íþrótt sem um getur.  Í hestamennsku þekkist ekki kynslóðabil, allir geta stundað hestamennsku saman.  Allir finna eitthvað við sitt hæfi og getu; íþróttakeppni, gæðingakeppni, útreiðar, náttúruskoðun eða að eiga rólega stund með hestum sínum eftir amstur dagsins.

Í aðdraganda kosninga vorið 2009 fer stjórn Landsambands hestamanna fram á það við þá sem bjóða fram lista til alþingis að þeir svari nokkrum spurningum er varða hagsmuni hestamanna.



1.    Er þinn flokkur tilbúinn  til þess að tryggja í vegalögum að reiðvegir séu flokkaðir þannig að réttur hestamanna sé tryggður á ákveðnum (götum) vegum og þá um leið umferð mótorknúinna ökutækja bönnuð nema sem um getur í 5. gr. a. 1.mgr. umferðalaga?

Greinargerð: Fallið hafa dómar sem eru þess eðlis að þeir tryggja ekki umferð og öryggi hestamanna á þeim vegum sem þeim eru ætlaðir sér í lagi er átt við akstur vélknúinna ökutækja einkum torfæruhjóla.

Svar Samfylkingarinnar:
Öryggi vegfarenda óháð því hvernig þeir ferðast er afar mikilvægt. Sérstakt kerfi fyrir bíla, annað fyrir gangandi, enn annað fyrir hjólandi, ríðandi, mótorhjól o.s.frv. Samráðs er þörf til að finna út hvaða ferðamátar geta samnýtt vegakerfi. Vandinn í sambandi við óskráð mótorkrosshjól er ekki síður spurning um áróður og að styrkja samvinnu við samtök þeirra sem stunda það sport.

2.    Árlega skapast gjaldeyristekjur upp á 12 til 14 milljarða króna í kringum íslenska hestinn og hestatengda ferðaþjónustu.  Er þinn flokkur tilbúinn að beita sér fyrir auknu fé til reiðvegamála t.d. ½ til 1% af þeim gjaldreyri sem hestamennskan skapar?
 
Greinargerð:  Á undanförnum árum hefur fé til vegamála aukist stórlega og ber að þakka það.  Hins vegar hefur þeim sem stunda hestamennsku fjölgað stórlega á undanförnum árum og þar með þörfin fyrir reiðvegi einnig.  Á síðasta ári var sótt um fjármagn að upphæð 300 milljónir til reiðveganefndar LH en einungis er til ráðstöfunnar á samgönguáætlun 2007 til 2010  um 60 milljónir á ári.  Dugir það fé vart til viðhalds núverandi reiðvega hvað þá nýlagna.

Svar Samfylkingarinnar:
Hafa þarf í huga að reiðvegir í þéttbýli eru annað en reiðvegir í dreifbýli. Þótt nú þurfi að skera mikið niður í ríkisrekstri á næstu árum er líka þörf á að fjárfesta í innviðum ferðaþjónustunnar og reiðvegir í dreifbýli eru hluti af slíkri uppbyggingu. Fordæmi eru fyrir því að á tímum atvinnuleysis sé ráðist í mannaflafrek verkefni eins og lagningu göngustíga og skynsamlegt væri að kanna möguleika á samvinnu vegagerðar um langingu slíkra stíga og reiðstíga við sveitarfélög og hagsmunasamtök.

3.    Telur þinn flokkur ástæðu til að færa reiðvegi frá umferðarþungum akvegum?

Greinargerð:  Í dag liggja flestir reiðvegir samsíða þungum umferðaræðum bæði innan þéttbýlis sem utan.  Á þessum reiðvegum er oft mikil umferð ríðandi fólks einkum í næsta nágrenni við þéttbýlið.

Svar Samfylkingarinnar:
Já. Þar vega þungt bæði öryggissjónarmið og sú staðreynd að við hliðina á hraðbraut er erfitt að vera “kóngur um stund”.


4.    Er þinn flokkur tilbúinn að beita sér fyrir því að hestaíþróttir verði viðurkenndar sem sérstök námsbraut í framhaldsskólakerfinu, þannig að þeir sem ljúka þar námi öðlist réttindi til t.d. tamninga, þjálfunar og að taka að sér og leiða hópa í ferðamennsku á hestum ?

Greinargerð:  LH bindur miklar vonir við samstarf  sitt og Fjölbrautaskóla Suðurlands um rekstur tveggja ára námsbrautar sem menntamálaráðherra  heimilaði, en þar er  reynt að finna grundvöll til reksturs tveggja ára almennrar hestabrautar þar sem nemenur útskrifast sem hestasveinar eða tamningarsveinar.  Gengur rekstur þessarar brautar vel og lofar góðu.
Nú er mikil vöntun á fólki til starfa tengdum íslenska hestinum. Finnst okkur þetta  því vera í anda þess sem mjög er til umræðu í menntamálum þ.e. að koma á verklegu námi þar sem ekki þarf að búa til eftirspurnina.  Þá má minna á að íslenski hesturinn tengist mjög menningu okkar Íslendinga og er þetta því einnig sögu og menningartengt nám.
   
Svar Samfylkingarinnar:
Já. Samfylkingin fjallaði sérstaklega um brotthvarf úr framhaldsskólum á sínum landsfundi og styður verknám heilshugar. Viðurkennd námsbraut fyrir hestaáhugamenn hefur gefist vel og því sjálfsagt að halda henni áfram. Ein af meginorsökum brotthvarfs úr framhaldsnámi er einmitt einhæfni og of mikil áhersla á bóknám. Námsbraut tengd hestafræðum og aðrar óhefðbundnar námsleiðir innan framhaldsskólakerfisins er svar við því.

5.    Er þinn flokkur tilbúinn eftir kosningar til að skoða skattalegt umhverfi hestamennskunnar með það að markmiði að minnka kostnað þeirra sem stunda hestamennsku?

Greinargerð:  Mikil óánægja er innan hestahreyfingarinnar með misjafna álagningu fasteignagjalda á hesthús þar sem þau eru ýmist flokkuð í A eða C flokk, þ.e. eftir því hvort þau standa á lögbýli eða innan þéttbýlis.  Stjórn LH telur að það gæti verið til bóta að lækka skatta á vissum þáttum tengdum  hestamennsku og reyna þannig að ná niður kostnaði og um leið að gera viðskipti tengdum hestamennskunni sýnilegri.  Lækkun kostnaðar í greininni eykur frekar á nýliðun í greininni og er þá sérstaklega horft til fjölskyldufólks.

Svar Samfylkingarinnar:
Skattheimta á að vera réttlát og jafnræði þarf að ríkja á meðal sambærilegra aðila. Það er jákvætt að nota skattkerfið til að smyrja hjól atvinnulífsins og sjálfsagt að skoða hvernig best er að útfæra skattheimtu á nýjar greinar þannig að það bæði skili réttlátum tekjum til samfélagsins og örvi vöxt í greininni.

6.    Er þinn flokkur tilbúinn til að beita sér fyrir lagabreytingu þannig að allir þeir sem eiga og rækta íslenska hestinn sitji við sama borð þegar kemur að ákvarðanatöku m.a. um ræktunarmarkmið íslenska hestsins og á hvaða rannsóknir tengdar íslenska hestinum skuli lagðar áherslur á, á hverjum tíma?

Greinargerð:  Í dag er þetta þannig að í lögum er kveðið á um að þú verðir að vera lögbýlingur til að geta setið í Fagráði en þar eru ákvarðanir teknar um ræktunarmarkmið og  þróunarstarf í hrossarækt.  Í dag eru  60 - 70% þeirra sem stunda hrossarækt ekki lögbýlingar heldur búa í þéttbýli og finnst félögum innan LH það algerlega ótækt að mismuna fólki með þessum hætti þar sem það er heimilt að halda hestinn í þéttbýli.

Svar Samfylkingarinnar:
Samfylkingin hefur ekki tekið sérstaka afstöðu til þessa máls en er hlynnt frelsi til athafna óháð búsetu. Því er sjálfsagt að endurskoða þessa skipan mála.

7.    Er þinn flokkur tilbúinn að beita sér fyrir því að LH njóti sömu meðferðar af hálfu ríkisvaldsins og t.d. önnur félagasamtök sem ríkið styrkir til mótahalds um landið?

Greinargerð:  Við rekstur síðustu þriggja landsmóta hefur verið greitt til svæða og í löggæslukostnað milli 40 - 50 milljónir sem er að mati okkar alltof  há upphæð þar sem við þurfum að skattleggja okkar félagsmenn og aðdáendur íslenska hestsins til að halda þessar fjölskyldu og íþróttahátíðir sem landsmót eru og eru einnig snar þáttur í menningu okkar.  Á sama tíma eru haldnir aðrir íþróttaviðburðir þar sem allur undirbúningur mótssvæða er greiddur af ríki og sveitarfélögum og öllum boðið frítt inn.

Svar Samfylkingarinnar:
Sjálfsagt að jafnræði ríki á milli sambærilegra aðila og móta. Væntanlega er þetta, eins og svo margt annað, verkefni sem félagasamtök, sveitarfélög og ríkið þurfa að leysa í sameiningu.