Nýir knapar inn í U-21 landsliðshópinn

17. mars 2023
Fréttir

Tveir knapar hafa verið kallaðir inn í U-21 árs landsliðshópinn í hestaíþróttum.

Hekla Katharína Kristinsdóttir landsliðsþjálfari hefur í vetur fylgst gaumgæfilega með þróun mála hjá unglingum og ungmennum (16-21 árs) á mótum sem af er. Hekla tilkynnti í haust að hópurinn væri opinn yfir tímabilið og fyrir utan góðan keppnisárangur er það forsenda fyrir valinu að knaparnir séu með hest falann í landsliðsverkefni ársins sem er HM í Hollandi.

Mótaraðir eru komnar á fullan skrið og fjöldi knapa gert góða hluti á hestum sínum þar. Meistaradeild ungmenna og Top Reiter og Mestaradeild æskunnar og Líflands eru mótaraðir sem vel er fylgst með ásamt yngri knöpum sem eru að taka þátt í öðrum mótum.

Í töltkeppni Meistaradeildar æskunnar og Líflands nú á dögunum voru gæðin frábær og þess má geta að 10 efstu knaparnir úr forkeppni eru allir þátttakendur í Hæfileikamótun LH eða í U-21 landslishópnum.

Nýir knapar sem valdir hafa verið inn í U-21 hópinn að þessu sinni eru Guðný Dís Jónsdóttir úr Hestamannafélaginu Spretti og Guðmar Hólm Ísólfsson Líndal úr Hestamannafélaginu Þyt.

Guðný Dís hefur náð frábærum árangri í keppni og verið stígandi í sinni reiðmennsku að undanförnu. Hún gerði gott mót í töltkeppninni í Meistaradeild æskunnar á Straumi frá Hofsstöðum og í fjórgangi á Hraunari frá Vorsabæ II.

Guðmar Hólm Ísólfsson Líndal hefur margoft sýnt og sannað að hann er ungur knapi í fremstu röð og hefur á árinu átt flottar sýningar á Jökli frá Rauðalæk í fjórgangi Meistaradeildar KS og svo sigraði hann T2 í Vesturlandsdeildinni á Vildísi frá Múla.

Þau Guðný og Guðmar eru boðin velkomin í U21-landsliðshóp LH.