Norðurlandamótið 2022 er haldið í Álandseyjum 9. til 14. ágúst

05. ágúst 2022
Fréttir
Kristinn Skúlason formaður landsliðsnefndar, Sigurbjörn Bárðarson A-landsliðsþjálfari og Hekla Katharína Kristinsdóttir U21 landsliðsþjálfari

Norðurlandamótið 2022 er handan við hornið og að þessu sinni fer það fram á Álandseyjum (Åland) á milli Finnlands og Svíþjóðar. Álandseyjar eru skerjagarður sem telur um 6500 eyjar á milli þessara tveggja landa. Mótið fer fram á  brokkkappreiðabraut sem kallast „travet mitt i havet“ („brokkið úti á hafi“) og liggur á meginlandi eyjanna rétt við Mariehamn.

Að venju sendum við Íslendingar landslið á mótið og hafa landsliðsþjálfarar okkar þegar tilkynnt liðið fyrir nokkru síðan þó einhverjar breytingar hafi orðið á uppstillingum á lokasprettinum. Hluti liðsins hélt utan í dag, föstudag 5. ágúst og síðustu knapar lenda á Álandseyjum á sunnudag 7. ágúst, því hluti hópsins er að keppa á Íslandsmóti barna og unglinga í Borgarnesi um helgina. Fyrir landsliðsteymi Íslands fara Kristinn Skúlason formaður landsliðsnefndar, Hekla Katharína Kristinsdóttir U21-landsliðsþjálfari og Sigurbjörn Bárðarson A-landsliðsþjálfari.

Á mótinu er keppt í öllum hefðbundnum greinum í íþróttakeppni ásamt því að löndin senda hesta og knapa til þátttöku í gæðingakeppni í unglinga- og ungmennaflokki og A-og B- flokki gæðinga.

Eðli og staðsetning Norðurlandamótsins gera að verkum að nokkuð öðruvísi er staðið að vali á knöpum og hestum í liðið en á heimsmeistaramótsárum og snemma var sú ákvörðun tekin að höfuðáhersla yrði lögð á þátttöku unglinga- og ungmennalandsliðs Íslands hvað fjölda knapa varðar, og með þeim yrðu sterkir og reynslumiklir knapar í eldri hópnum.

Landslið Íslands í unglinga-og ungmennaflokki samanstendur af feiknalega sterkum knöpum sem hafa náð góðum árangri í keppni hér á landi og í hópnum eru bæði lánshestar, reynslumikil keppnishross sem eiga góðan árangur með sínum knöpum, og einn knapi tók með sér hest sinn frá Íslandi til Álandseyja.

Það er mál manna að Hekla Katharína Kristinsdóttir landsliðsþjálfari U21 liðsins hafi með góðum undibúningi og utanumhaldi náð að setja saman hörkuspennandi lið ungra knapa með góð hross í öllum greinum sem mætir til leiks á mótinu.

Sigurbjörn Bárðarson landsliðsþjálfari A-landsliðsins mætir til leiks með nokkuð fámennan hóp knapa, sem er hokinn af reynslu og með sterkan hestakost. Staðsetning mótsins að þessu sinni gerði það að verkum að erfitt reyndist að flytja hesta af meginlandi Evrópu upp til Álandseyja í þá áreynslu sem slíkt mót er, og því var ákveðið að liðið yrði lítið en reynslumikið sem er einmitt gríðarlega mikilvægt til stuðnings þeim stóra hópi knapa sem keppir í yngri flokkum mótsins.

Það er von landsliðsnefndar LH að þessi samsetning landsliðsins muni skila sér í miklum lærdómi og reynslu til frambúðar fyrir þá knapa sem mótið sækja.

Norðurlandamótið hefst á þriðjudaginn 9. ágúst og lýkur þann 14. ágúst. Við munum að sjálfsögðu fylgjast vel með mótinu og greina frá gangi mála á meðan á því stendur.

Keppendur í íþróttakeppni í flokki ungmenna og unglinga:

Embla Lind Ragnarsdóttir og Smiður frá Slätterne - V1/T1
Eva Kærnested og Garri frá Fitjum - V1/T2
Glódís Rún Sigurðardóttir og Glaumur frá Geirmundarstöðum - F1/T1/P1/P2/PP1
Guðmar Hólm Líndal og Kjarkur frá Lækjamóti II - V1/T2
Hákon Dan Ólafsson og Viktor frá Reykjavík - V1/T1
Harpa Dögg Bergmann Heiðarsdóttir og Heiður frá Boänge - V1/T1
Hekla Rán Hannesdóttir og Fylkir frá Oddsstöðum I - F1/T1/PP1
Hulda María Sveinbjörnsdóttir og Hetja frá Árbæ - F1/T2/PP1
Kristófer Darri Sigurðsson og Valur frá Heggsstöðum - V1/T2
Matthías Sigurðsson og Roði frá Garði - V1/T1
Selma Leifsdóttir og Fjalar frá Selfossi - V1/T2
Védís Huld Sigurðardóttir og Stimpill frá Varmadal - V1/T2

Keppendur í gæðingakeppni í flokki ungmenna og unglinga:

Guðmar Hólm Líndal og Konráð frá Navåsen
Matthías Sigurðsson og Carúzo frá Torfunesi
Eysteinn Tjörvi Kristinsson og Laukur frá Varmalæk
Hulda María Sveinbjörnsdóttir og Glóð frá Háholti
Védís Huld Sigurðardóttir og Riddari frá Hofi

Keppendur í íþróttakeppni í flokki fullorðinna:

Jakob Svavar Sigurðsson og Hálfmáni frá Steinsholti - V1/T1
Sigurður Vignir Matthíasson og Starkar frá Egilsstaðakoti - F1/T1/P1/PP1/P2

Keppendur í B-flokki gæðinga:

Glæsir frá Torfunesi og Finnur Bessi Svavarsson
Leistur frá Toftinge og Hanna Rún Ingibergsdóttir

Keppendur í A-flokki gæðinga:

Blikar frá Fossi og Sigurður Vignir Matthíasson
Eldjárn frá Skipaskaga og Jakob Svavar Sigurðsson
Frami frá Arnarholl og Hanna Rún Ingibergsdóttir
Leikur frá Lækjamóti og Helga Una Björnsdóttir