Fréttir

NM2008 Galsasynir fljótastir vekringa

Guðmundur Einarsson náði bestum tíma í 250 m skeiði í fyrri umferð á NM2008. Sproti hljóp báða sprettina undir 23 sekúndum af miklu öryggi. Annan bestan tímann fékk Malu Logan á Skyggni frá Stóru- Ökrum. Hann hljóp einsamall í fyrsta spretti og fór þá á 23,36 sekúndum. Hann lá ekki seinni sprettinn. Malu keppir fyrir Danmörku.

NM2008 Jóhann leiðir í tölti fullorðinna

Jóhann Skúlason á Kiljan frá Blesastöðum 1A er efstur í tölti fullorðinna á NM2008 eftir forkeppni. Hann keppir fyrir Ísland. Jóhann reið prógrammið fagmennlega eins og hans er háttur. Hann reið nú við hringamél í stað stangaméla í fjórganginum. Hæga töltið var ekki eins bragðmikið og í fjórganginum en eigi að síður mjög gott.

Íslandsmótin á plani næstu tvö árin

Íslandsmót fullorðinna 2009 verður haldið hjá Létti á Akureyri. Íslandsmót barna og unglinga 2009 verður haldið hjá Herði í Mosfellsbæ. Íslandsmót fullorðinna 2010 verður haldið hjá Sörla í Hafnarfirði. Íslandsmót barna og unglinga 2010 verður haldið hjá Þyti í Húnaþingi.

NM2008 Hekla Katarína efst í tölti

Hekla Katharina Kristinsdóttir á Gusti frá Kjarri er efst í tölti ungmenna á NM2008 eftir forkeppni. Hún reið fumlaust á toppinn þegar nokkuð var áliðið á keppnina. Rétt á hæla henni er annar íslenskur keppandi, Edda Rún Guðmundsdóttir á Sporði frá Höskuldsstöðum með 6,57. Það er því mjótt á munum og stefnir í tvísýn úrslit.

NM2008 T2 Tölt fullorðinna

Eva-Karin Bengtsson á Kyndli frá Hellulandi er með afgerandi yfirburði í slaktaumtölti fullorðinna á NM2008. Hún er með 7,80 í einkunn en næsti keppandi með 7,07. Hún keppir fyrir Svíþjóð. Kyndill er undan Andvara frá Ey og Dvöl frá Syðri-Brekkum, Viðarsdóttur frá Viðvík.

Tölt T2 – Unglingar og ungmenni

Valdimar Bergstað er fimmti inn í A úrslit í slaktaumatölti unglinga og ungmenna, en þeim flokkum er steypt saman í þessari grein. Valdimar reið hestinum Gauk frá Kílhrauni. Teitur Árnason og Ragnheiður Hallgrímsdóttir eru í níunda og tíunda sæti.

Norðurlandamótið í hestaíþróttum sett í gær

Norðurlandamótið í hestaíþróttum, NM2008, var sett í gær, miðvikudag. Mótið er haldið í Seljord í Noregi, en þar hafa áður verið haldin Norðurlandamót og heimsmeistaramót í hestaíþróttum.

Bjarnleifur hættir sem formaður

Bjarnleifur Bjarnleifsson, formaður Gusts í Kópavogi, mun ekki gefa kost á sér til áframhaldandi formannssetu. Aðalfundur félagsins verður haldinn í Glaðheimum fimmtudaginn 27. nóvember klukkan 20.00.

NM2008 Guðmundur Einarsson með yfirburði í gæðingaskeiði

Guðmundur Einarsson á Sprota frá Sjávarborg hafði algjöra yfirburði í gæðingaskeiði fullorðinna á NM2008 í Seljord. Hann fékk 8,71 í einkunn. Hann keppir fyrir Svíþjóð. Næsti keppandi, Sigurður Óskarsson á Kolbeini frá Þóroddsstöðum, fékk 8,04 í einkunn.

NM2008 Gæðingaskeið ungmenna, gullið til Svía

Teitur Árnason á Hraunari frá Kirkjuferjuhjáleigu var hársbreidd frá Norðurlandameistaratitli í gæðingaskeiði ungmenna á NM2008 í Seljord. Niðurhæging í fyrri spretti mistókst en seinni spretturinn var mjög góður. Hann hafnaði í öðru sæti. Það var hins vegar Svíinn Hedvig Larsson sem hreppti gullið með nokkrum yfirburðum, fékk 6,30 í einkunn. Arnar Bjarki Sigurðsson á Snar frá Kjartansstöðum varð fjórði.