Dregið var í happdrætti Meistaradeildar VÍS á dögunum og eru upplýsingar um vinningshafana komnar inn á heimasíðu deildarinnar www.meistaradeildvis.is

Halda átti lokamót Meistaradeildar VÍS Sumardaginn fyrsta, 22. apríl s.l. En eins og flestir vita þurfti að fresta mótinu sökum þess að hósta-og kvefpestin var komin upp í hrossum hjá rúmlega helmingi knapa deildarinnar.

Kiljan frá Steinnesi hlaut háar einkunnir á héraðssýningunni í Víðidal, hækkaði í yfirlitinu og er kominn með aðgöngumiða inn á Landsmót með aðaleinkunnina 8,71. Kiljan virðist hafa náð fyrri styrk eftir hóstapestina svonefndu og segir Þorvaldur Árni Þorvaldsson, þjálfari hans, að hesturinn sé hress, sprækur og orkumikill. Nánast öll hrossin eru komin í þjálfun á ný eftir pestina á hestabúinu Hvoli í Ölfusi þar sem Þorvaldur Árni er yfirþjálfari og tamingamaður.

Vegna kvefpestar sem nú herjar á hross hafa skráningar verið dræmar á kynbótasýninguna í Hafnarfirði og því hefur verið ákveðið að sýning þar hefjist ekki fyrr en 25. maí en ekki 17. maí eins og til stóð. Sýningunni lýkur með yfirlitssýningu föstudaginn 28. maí og mun hún verða auglýst betur þegar nær dregur. 

Lífland býður konum í Reykjavík og nágrenni á kvennakvöld í verslun okkar að Lynghálsi, miðvikudaginn 12. maí kl. 18:00. Veldur hver á heldur – afköst hestsins endurspegla knapann. Hvernig hefur áseta okkar áhrif á hreyfingar hestsins? Getum við þvingað hreyfingar hestsins með rangri ásetu eða stjórnun? Artemisia Bertus, tamningamaður og reiðkennari kemur til okkar og talar um samband manns og hests á áhugaverðum fyrirlestri.

Yfirlitssýning kynbótahrossa  í Víðidal er á morgun miðvikudaginn 12. maí  og hefst kl. 9:00. Byrjað verður á hryssum í flokki 7 vetra og eldri og endað á stóðhestum 7 vetra og eldri.  Reiknað er með að yfirlitssýningu verði lokið um kl.11.  Röðun í holl verður birt fyrir miðnætti í kvöld.                                   

Vegna mikilla veikinda í hestum á Akureyri og nágrenni hefur Léttir ákveðið að fresta kennslu á Knapamerkum 2-3-4 og 5 í 2 vikur og þá verður staðan metin hvort hægt verði að halda áfram kennslu. Keppnisnámskeiðinu verður einnig frestað um 2 vikur og verður staðan metin þá.

Tölvunefnd LH hefur staðið í ströngu undanfarnar vikur og haldið námskeið í Kappa – Mótafeng víðsvegar um landið við góðar undirtektir. Vakin er athygli á því að komin er í gagnið nýr Kappi – Mótafengur og eldri útgáfur úreltar.

Hestapestin svonefnda virðist heldur í rénun og eru mörg hross á góðum batavegi, segir Sigríður Björnsdóttir, dýralæknir hrossasjúkdóma. Hún segir meðal annars í viðtali við fréttavef Landsmóts að þær vikur sem til stefnu eru fram að Landsmóti ættu í flestum tilfellum að duga til að undirbúa hrossin fyrir mótið. Viðtalið við Sigríði í heild sinni fer hér á eftir.

Mótanefnd, firmakeppnisnefnd og stjórn Léttis funduðu í dag og ákveðið var að fresta Firmakeppni og Opna Norðurlandsmótinu sem halda átti í næstu viku. Stefnan er að halda firmakeppnina i kringum 17. júní ef heilsa hrossanna leyfir.