„Ég fagna þessari hugmynd fagráðs. Með þessu er verið að koma til móts við hinn almenna hestamann og ræktanda í LH,“ segir Haraldur Þórarinsson, formaður LH, um þá hugmynd Kristins Guðnasonar að færa kynbótasýningar inn á hringvöll.

„Ef við viljum halda áfram útrás íslenska hestins og íslenskrar hestamennsku, þá er rökrétt að við styrkjum FEIF. Það væri hins vegar best fyrir samtökin að þau yrðu sjálfbær í framtíðinni. Við ættum að styrkja þau til þess,“ segir Haraldur Þórarinsson, formaður LH.

„Það er að mínu mati tímabært að ræða breytingar á sýningarformi kynbótahrossa. Ég hef verið þeirrar skoðunar um nokkurt skeið að hringvöllurinn sé betur til þess fallinn að meta hið raunverulega kynbótagildi. Auk þess finnst mér það fallegra sýningarform,“ segir Kristinn Guðnason, formaður Félags hrossabænda og fagráðs í hrossarækt.

Hestamannafélögin á Vesturlandi hafa boðið kollegum sínum í Norð-Vestur kjördæmi að taka þátt í Fjórðungsmóti hestamanna á Kaldármelum næsta sumar. Formenn félaganna á svæðinu hafa tekið vel í hugmyndina. Mótið verður haldið fyrstu helgi í júlí 2009.

„Við þurfum að verja rétt okkar hvað varðar fornar reiðleiðir. Við höfum verið of linir og þurfum að brýna járnin,“ sagði Kristinn Hugason á Landsþingi LH. Þótti honum óþarfa undansláttur í greinargerð með tillögu reiðveganefndar um Kóngsveg.

Bjarni Þorkelsson á Þóroddsstöðum tók undir hugmyndir á LH þingi um sérstaka ráðstefnu um Landsmót. Hann hafði áður vakið máls á þeirri hugmynd að skipta Landsmótunum.

„Það er ekki tími til ræða jafn viðamikið mál og Landsmót á svona þingi. Það þarf að boða til ráðstefnu sem stendur í það minnsta í heilan dag,“ sagði Jónas Vigfússon, formaður Funa í Eyjafirði á Landsþingi LH.

Fimmtugasta og sjötta Landsþing LH tókst prýðilega. Nokkrar tillögur voru samþykktar, sem til framfara þóttu, en margar voru felldar. Allmörgum tillögum var vísað til stjórnar eða í milliþinganefnd. Engin átakamál lágu fyrir þinginu, sem var friðsamt.

Nú er hægt að sjá afgreiðslu tillagna á LH þingi 2008 hér á síðunni. Með því að smella á \"Landsþing\" í hnapparöðinni hér til vinstri, og síðan á \"Afgreiðsla þingskjala 2008, neðst á síðunni.

Kópsmenn fengu hrós frá formanni LH fyrir vel skipulagt og gott Landsþing. Ekki síður fyrir gott viðmót. Ritarar þingsins voru báðir úr Kópi. Það voru þær Fanney Ólöf Lárusdóttur og Elín Heiða Valsdóttir. Leistu þær sitt verk vel af hendi.