Arnar Logi Lúthersson og Frami frá Víðidalstungu II sigruðu í A-úrslitin í unglingaflokki með glæsibrag, með einkunnina 8,80. Arnar Logi er fulltrúi hestamannafélagsins Harðar, en það er Grettir Jónasson einnig sem hlaut fyrsta sætið í ungmennaflokki. Er ástæða til að óska Herði til hamingju með glæsilega fulltrúa úr yngri deildum félagsins.

Sigurbjörn Bárðarson og Flosi frá Keldudal áttu besta tímann í 250 metra skeiði, 22,95 sek. Snorri Dal og Speki frá Laugardal fóru 150 metrana á 15,04 sek og höfnuðu í efsta sæti. Mikil stemning var í brekkunni þegar skeiðkeppnin fór fram.

Birna Ósk Ólafsdóttir fór með sigur af hólmi í A-úrslitum í barnaflokki á Smyrli frá Stokkhólma. Hlaut hún einkunnina 8,82. Frábær tilþrif sáust í barnaflokknum og var haft á orði hversu góða reiðmennsku ungu knaparnir sýndu.

Hróður frá Refsstöðum hlaut fyrsta sætið og Sleipnisbikarinn að þessu sinni, sem er veittur þeim stóðhesti sem hlýtur heiðursverðlaun fyrir afkvæmi. Hróður er aðeins 13 vetra gamall, en getur þó státað af því að eiga yfir 50 dæmd afkvæmi.

Aris frá Akureyri sigraði A-flokk gæðinga eftir magnþrungna úrslitakeppni. Árni Björn Pálsson var að vonum glaður með árangurinn og lyfti bikarnum hátt á loft. Kolskeggur frá Oddhóli stóð efstur fyrir skeiðið, en hann lá ekki í fyrri sprettinum og svo kom í ljós að dottið hafði skeifa undan klárnum.

Sigurbjörn Bárðarson hlaut Gregersen styttuna að þessu sinni, enda hefur hann verið fyrirmynd annarra í hestamennskunni um árabil. Þótti það sárabót fyrir Sigurbjörn að hljóta þennan heiður eftir að hafa orðið af sigrinum í A-flokki gæðínga.

Átjánda Landsmóti hestamanna lauk í dag með magnþrunginni keppni í A-flokki gæðinga. Milli 13 og 14 þúsund manns fylgdust með úrslitastundinni og hylltu hestana og knapa þeirra ákaft í lokin.

Ferðaskrifstofa allra hestamanna, Úrval-Útsýn verður með ferð á þýska meistaramótið 14.-18. ágúst 2008. Aðeins 25 sæti í boði og gildir reglan að fyrstur kemur fyrstur fær. Það er hinn síungi gleðigjafi, Sigurður Sæmundsson sem verður fararstjóri í ferðinni og ætlar að sjá til þess að hláturtaugarnar verði kitlaðar svo um munar.

Stjórn Landsambands hestamannafélaga hefur ákveðið að ganga til samninga við Önnu Valdimarsdóttur um að taka að sér umsjón með úrvalshópi unglinga á vegum LH. Henni til aðstoðar verður Eyjólfur Þorsteinsson.

Hið íslenska Hestatorg verður sett upp á landsmótssvæðinu á Hellu í næstu viku. Hestatorgið er samstarfsverkefni félagasamtaka, stofnana og skóla er tengjast hrossarækt og hestamennsku á Íslandi. Markmið verkefnisins er að leggja áherslu á Ísland sem upprunaland íslenska hestsins og kynna það fjölbreytta starf sem fram fer innan þessa geira hér á landi.