Leiðin að gullinu- sýnikennsla í skeiði

Elvar Þormarsson og Fjalladís frá Fornusöndum eru orðin sérfræðingar í gæðingaskeiði

Leiðin að gullinu

Menntadagur íslenska landsliðsins í hestaíþróttum

10 desember kl. 10:30-15:30 í TM reiðhöllinni í Víðidal

Missið ekki af frábæru tækifæri til þess að fræðast og fá innblástur frá okkar allra bestu knöpum.

Þetta er einstakt tækfæri fyrir fróðleiksþyrsta hestamenn að koma og læra, hitta hestamenn og fylgjast með veglegri fræðsludagskrá á vegum landsliðsknapa okkar.

Sýnikennslur verða í gangi yfir allann daginn um mismunandi efni, vegleg veitingasala og ýmiss varningur til sölu á staðnum til styrktar landsliðinu.

Í íslenska landsliðinu í hestaíþróttum eru knapar sem hafa algjöra sérstöðu þegar kemur að þjálfun og keppni í skeiðgreinum.

Á kennslusýningunni þann 10 des verða skeiðknaparnir Konráð Valur Sveinsson og Sigursteinn Sumarliðason með sýnikennslu sem fjallar um uppbyggingu og þjálfun kappreiðavekringa. Þeir fjalla um styrk, snerpu og þol skeiðhestsins, þjálfun fyrir kappreiðar og mismunandi áherslu fyrir mismunandi greinar kappreiðaskeiðs.

Hverjar eru áherslur fyrir 100 m skeið? 150 eða 250 m skeið? Fljúgandi start eða rásbásar? Hvað ber að hafa í huga?

Sigursteinn og Krókus frá Dalbæ áttu einn af bestu tímum ársins í 250 m. Skeiði 2022, og Krókus er af mörgum talinn einn alfljótasti skeiðhestur heims í dag.

Konráð Valur er ókrýndur konungur kappreiðaskeiðsins um þessar mundir, skeiðknapi ársins 2022, ríkjandi heimsmeistari í 100 m skeiði og margfaldur landsmóts- og Íslandsmeistari í skeiði.

Elvar Þormarsson og Hans Þór Hilmarsson ætla einnig að halda sýnikennslu um þjálfun og uppbyggingu fyrir gæðingaskeið.

Gæðingaskeiðið er tæknigrein skeiðgreinanna, og snýst um tæknilega útfærslu á því hvernig á að leggja á skeið, aðdraganda, niðurtöku, skeiðkafla og niðurhægingu.

Elvar er ríkjandi Íslandsmeistari í gæðingaskeiði á Fjalladís frá Fornusöndum, og hefur á árinu verið ósigrandi í greininni með himinháar einkunnir.

Hans Þór Hilmarsson hefur á árinu átt hverja stjörnusýninguna á fætur annari í kynbótabrautinni, og setti meðal annars heimsmet í einkunn fyrir hæfileika á Sindra frá Hjarðartúni og var samanlagður sigurvegari skeiðleika Skeiðfélagsins 2022.

Tryggið ykkur miða á www.lhhestar.is