Um Landssamband hestamannafélaga
Landssamband hestamannafélaga (LH) er æðsti aðili innan Íþrótta- og Ólympíusambands Íslands (ÍSÍ) um alla þætti hestaíþrótta og málefni þeim tengdum.
Upphafið:
Fræinu að stofnun landssamtaka hestamanna var sáð á svonefndum Þingvallafundi 1941. Það var Jón
Pálsson, dýralæknir á Selfossi og þáverandi formaður Sleipnis, sem átti hugmyndina að þeirri samkomu en hana sóttu um 140 hestamenn
úr fjórum hestamannafélögum: Fáki, Faxa, Glað og Sleipni. Komu þeir ríðandi á 333 hrossum og dvöldu þar yfir helgi. Á
þessum fundi varpaði Gunnar Bjarnason, þá nýráðinn hrossaræktarráðunautur, fram hugmynd að stórsýningu á hestum
á Þingvöllum, sem síðar varð að fyrsta Landsmóti hestamanna 1950.
Landssamband hestamannafélaga var stofnað í Baðstofu iðnaðarmanna 18. desember 1949. Tólf hestamannafélög
lögðu grunninn. Gunnar Bjarnason leiddi undirbúningsvinnu að stofnun sambandsins en fyrsti formaður þeirra var H.J. Hólmjárn. Í fyrstu lögum LH
segir m.a.: „Markmið sambandsins er að vinna að bættri meðferð hesta, sérræktun íslenzks reiðhestakyns og framgangi
reiðhestaíþrótta....“
Tilgangur og markmið:
Auk hefðbundinnar keppni, æfinga og þjálfunar til líkamlegrar heilsuræktar, samanber lögum ÍSÍ, er það í
verkahring LH að sinna hagsmunamálum sem tengjast hestaíþróttum svo sem á sviði ræktunarmála, tamninga, samgöngu- og ferðamála,
landnýtinga- og umhverfismála.
Önnur markmið eru m.a:
- Að hafa yfirumsjón og vinna að eflingu hestamennsku m.a. með fræðslu, útbreiðslu- og kynningarstarfsemi.
- Að vera málsvari hestamanna jafnt innanlands sem erlendis.
- Að eiga samstarf við önnur samtök er sinna hagsmunamálum hestamanna, svo sem á sviði ræktunarmála, tamninga, samgöngumála, ferðamála, landnýtingar og umhverfismála á vegum ríkis og sveitarfélaga.
- Að koma fram gagnvart opinberum aðilum.
- Að vinna að stofnun nýrra sérráða.
- Að setja nauðsynlegar reglur, löggilda dómara, ráðstafa landsmótum og staðfesta met.
- Að vera fulltrúi hestaíþrótta gagnvart erlendum aðilum og sjá um að reglur varðandi greinina séu í samræmi við
alþjóðareglur þar sem það á við.
Úr lögum og reglum LH
